Waylima Sangun Jaya

Kham Andan Jejama

Wawancan Perjuangan

Posted by apripejer pada 16 Agustus 2010


KHiwayat Tanoh Lampung, pekhang lawan Belanda
Kukhuk jak Telukbetung, di tahun ampat siwa
Masa sina tihitung, bulan Januakhi nama

KHani Sabtu sai ulung, tanggal satu sai nyata
Tanggal sina tipegung, tisikhokkon di dada
Selingkung Tanoh Lampung, gegoh haga binasa

Penduduk jadi bingung, semapu di kehaga
Ya siap tekhus lijung, segok mit delom khimba
Apal bantal tiusung, bias mak dapok lupa

Gimbak selukhuh Lampung, khakyat ngembila nyawa
Tandak jak Telukbetung, lapah pugapa-gapa
Pegawai kukhuk kampung, lijung nutuk tentekha

Di Panjang tum-ta-le-tum, timbakanni Belanda
Lamban lamon sai tutung, tisuwah tibinasa
Pelitik delom hitung, nyin dang disi Belanda

KHakyat pindah mit kampung, ngembatok sai kuasa
Kancah khayoh tiusung, alat hukhik di khimba
Kokhban lamon tihitung, sai mati khik binasa

Ditawan khik digantung, dipukul khik digada
Pemuda sai dikukhung, tekhus kukhuk penjakha
Kidang ya mawat ukhung, khakyat ngelawan juga

Sinalah gakha-gakha, Belanda mungkikh janji
Kesalahanni nyata, melanggakh Linggakhjati
Naskah KHenville binasa, batal sama sekali

Hakhta lamon binasa, khakyat lamon sai mati
Segok mit delom khimba, diunut debi pagi
Dihalu kham digada, ditali pakai huwi

Matti luwak Belanda, mak ngedok kasihanni
Mak dapok tungga jelma, culukni mak buhinti
KHasan keliwat sakha, susah jakhang bandingni

Lapah pucakhda-cakhda, khisok nihan kukhang mi
Jak huma mit di huma, lapah ngunut khejeki
Ki tungga jelma suka, mengan kham khadu kakhi

Kipak mak suwa iwa, ki muka suka hati
Unyin kham mendekhita, kenyin guai pengaji
Kekikha bulan lima, mupakat delegasi

KHum-KHoyen tian khuwa, sina awal mulani
Pekhsetujuan sai nyata, pekhang haga buhinti
Pekhletakan senjata, pangkal aman negekhi

Ya mak beni jak sina, mupakat tipubiti
Sidang ngeliling mija, K.M.B. gelakhni
Di negekhi Belanda, kumpul do delegasi

Bung Hatta kham bicakha, nyepok sai betik hani
KHam amankon dunia, nyin dang selisih lagi
Putusan awal mula, KHepublik kham kembali

Kembali mit di Jogja, sina ibu negekhi
Tanggalni kham mak lupa, jatuh di enom Juni
Pekhletakan senjata, syakhat penting sekali

Menukhutkon sai nyata, pekhang yaddo buhinti
Pemekhintah di Jogja, mulai bekekhja lagi
Sipil jama tentekha, khituk dawah debingi

Ngatokh segala kekhja, pegawaini dicakhi
Kabinet sidang juga, KNIP-ni mak buhinti
Mulai jak bulan siwa, pekhang khadu mak lagi

KHam tinggal nunggu masa, tahap penyelesaianni
Selukhuh Indonesia, enom belas negekhi
KHIS bentuk negakha, ikatan saunyinni

Sina mak jadi ngeba, asal satu maksudni
KHam satu cita-cita, mekhdika khik abadi
Kedaulatan sai nyata, mak ngedok syakhat lagi

Lepas kham jak Belanda, ngatokh dikhi sendikhi
Selukhuh Indonesia, tinggal megung kemudi
Haga lapah mit dipa, kham jadi jekhaganni

Tinggal kham bekhusaha, dang buhinti buhinti
Kenyin negakha jaya, makmukh sepanjang hakhi
Sai nanti ngekhasa ya, kham saunyin-unyinni

Sampai munih bekhita, di tanggal dua tujuh
Desembekh khadu nyata, ticatat sungguh-sungguh
Penyekhahan Belanda, kedaulatan sai penuh

Tanggal khik khani sina, cakakni Handak-Suluh
Mekhah-Putih bendikha, bekibakh yaddo kukuh
Mulai jak waktu sina, mekhdika kham kak penuh

Jak tahun ampat siwa, hati kham dang ki ginjuh
Belanda mak kuasa, jak tahun lima puluh
Sampailah cita-cita, dengan tekad sai teguh

Cawani bapak kita, dang kuti hati khusuh
Bekhsatu khik sekata, musyawakhat di tiuh
Sina pangkal bahagia, lamun tipegung kukuh

Ya mak mudah sekali, menuju cita-cita
Mak tantu bingi khani, bulan tahun khik masa
Sina mula kubiti, nyin kham buinda-inda

Pi’il bangsa kham hinji, haga ki senang ganta
Mula susah sekali, ngendidik bangsa kita
Titawai mak ngekheti, insafni jaoh nana

KHIS khadu bekhdikhi, hasil kham jama-jama
Dang kuti tinggi hati, kak nepuk-tepuk dada
Banguk kham ati-ati, mudah tunai ki cawa

Seia khik sehati, seasas cita-cita
Sina mula kubiti, sebab wat munih jelma
Cawa mak ati-ati, mak ngedok tata basa

Negakha kham ji hani, hasil sikam bekhjuang
Lain hak ulih kuti, pekhtaymu mawat menang
Injuk delom hanipi, ya cawa sambil lalang

Pikikh kuti puwakhi, sebab sapa kham menang
Hasil jak delegasi, ulih K.M.B. sidang
Sedongkon tiyan sudi, mak cawa sikam menang

Sebab ukhusan negekhi, lain hak ulih lalang
Nyak hakhap jama kuti, ati-ati bubilang
Dang ngembalakkon dikhi, ulih kham lagi senang

Ana do KHIS bekhdikhi, dang kuti anggop gampang
Kemakmukhan negekhi, sina hasil bekhjuang
Pikha jumlah kokhbanni, mawat sai dacok bilang

Pasal soal kokhupsi, sina negakha halang
Dang kuti lunik hati, cawa jo nyata tekhang
Bekekhja jaman sinji, lain mudah khik gampang

Dang kukhang ati-ati, delom KHIS kham bekhjuang
Nontong di kanan kikhi, jaohkon sai dilakhang
Pi’il sai ngeba khugi, payu ganta kham buang

Jaohkonlah kokhupsi, mencatut di jawatan
Pemimpin kham mak ngeni, kantu bang kham tulahan
Kantu kham kukhuk buwi, bakhang jadi khampasan

Salamku jama kuti, betik-betik bekhjuang
Nawaitu delom hati, sina jadi pedoman
Hukhik kham ji mak beni, kham musti pindah jengan

Pegawai musti tabah, ngekhjakon administkhasi
Disan sungi sai mudah, ngelakukon kokhupsi
Sanajin ya disumpah, kidang pagun mak bukti

Lah lawi matti payah, ki mak insaf di dikhi
Mawat khabai di tulah, asal nyak mansa hani
Mula nyak buginalah, kapan kham haga jadi

Semuga Insya Allah, sampai maksudni dikhi
Bekhjuang dang gelisah, tetop iman di hati
Kantu kekhja kham salah, negakha jadi khugi

Tantu pemimpin makhah, takhu goh niku hani
Jelma ji lagi nayah, mak guna niku lagi
Pekhbuatanmu na salah, ngekhugikon negekhi

Ana ya kupabalah, kenyin kham ati-ati
Delom KHIS bekhjuanglah, dengan giat sekali
Nyin bangsa kham senanglah, di kemudian hakhi

Kisah haga kubalin, lain munih bekhita
Ki mansa kabakh angin, pikikh pai benokh sina
Titilik penyin-penyin, nyin dang salah galipa

Negakha bekhdisipelin, ngehokhmati sai tuha
Sai sanak kham tipimpin, sosial khadu nyata
Negakha khadu balin, dijajah kham mak haga

Nasihatni pemimpin, ngaji pai Panca Sila
Tipaham khajin-khajin, Undang Dasakh Negakha
Tipelajakhi unyin, tujuanni mekhdika

Tikaji unyin-unyin, pekabakhan bekhita
Cuba pikikh pekhwatin, selama kham mekhdika
Makkung belajakh unyin, sina mula binasa

Ulih ya kukhang penyin, cutik-cutik mekhdika
Tipasalah pemimpin, tihina khik tiwada
Padahal Pak Pemimpin, lamon sai mendekhita

Kidang mak khena unyin, wat bilangni sai khuwa
Nyepok pemimpin tulin, susah jakhang titungga
Lamon ngaku pemimpin, kidang sekadakh cawa

Ana ya kupakicik, sejakh guai kakikha
Pahikni pil tikanik, nyin dang badan binasa
Guai pedoman hukhik, ngisi jaman mekhdika

Masani ampai cutik, lima tahun sai nyata
Ki sanak lagi lunik, ki cawa lagi uba
Tanoman lagi khenik, ampai ngembulung khuwa

Kapan haga tikanik, ki kham mak bekhusaha
KHam jaga betik-betik, kenyin negakha jaya
Mekhdika tekhang bangik, liak pai lain bangsa

Ganta nyak balin kisah, di tentang pekhsatuan
Dang kuti pecah belah, jejama kham buiman
Pikikhkon kuti kidah, di saat pekhjuangan

Dinana kham na susah, bangkang unyinni lamban
Mak ngedok tanda khagah, unyinni kekhabaian
Ya timbul alam wuwah, kham tapok selagaan

Mulani kupabalah, ngeliak kenyataan
Semakhga pecah belah, mak niongkon alasan
Unyinni ngaku gagah, seucak di tukhunan

KHam unyin lagi salah, di tentangni hejongan
Kuhakhap pai bekhubah, kham khadu balin jaman
Wa’tashimu bi hablillah, tigunakon pai Qukh’an

Dang kuti pecah belah, kantu bang kham tulahan
Ngayun kham bekhsatulah, kenyin wat kekuatan
Pemimpin khik pasikhah, khakyat kham kilu aman

Ki nyadang gila mudah, payah kham ki ngedandan
Agama tipabalah, dang mak ingok di Tuhan
Halal hakham tipisah, dang nutuk daya sitan

Dunia khadu gunjah, gudani mak ketahan
Ki iman kham mak tabah, kukhuk dayani sitan
Antak ija pai kisah, wawancan pekhjuangan

KHiwayat kham tamatlah, puput di antak hinji
Segala kupabalah, jak awal mit akhikhni
Benokhkon ki ya salah, adik bapak puwakhi.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

 
%d blogger menyukai ini: